ឯកឧត្តមផៃ ស៊ីផាន ៖លោកសម រង្ស៊ីថាជា អនក្ខរជន
12-May-2016 | ដោយ មែន កំសត់
ភ្នំពេញ ៖ ជាការឆ្លើយតបទៅនឹងការលើកឡើងរបស់លោកសម រង្ស៊ី ប្រធានគណបក្សប្រឆាំងធំជាងគេនៅកម្ពុជាដែលបានប្រៀបធៀបជំនួយពី ប្រទេសចិន និងសហរដ្ឋអាមេរិក ថា “ជំនួយពីចិនជាការដាក់បន្ទុកយ៉ាងធ្ងន់ទៅលើកូនចៅ ឯជំនួយពីអាមេរិកផ្ដល់ផលប្រយោជន៍ក្នុងវិស័យពាណិជ្ជកម្ម និងវិនិយោគ”នោះឯកឧត្តមផៃ ស៊ីផាន អ្នកនាំពាក្យទីស្ដីការគណៈរដ្ឋមន្ដ្រី បានហៅលោកសម រង្ស៊ី ថា ជាអនក្ខរជនដែលខ្វះការទទួលព័ត៌មាន។
ដើម្បីជាការបំភ្លឺដល់សាធារណជនឲ្យយល់ និងជាការឆ្លើយតបទៅលោកសម រង្ស៊ី វិញផងនោះ ឯកឧត្តមផៃ ស៊ីផាន បានបញ្ជាក់ថាជំនួយដែលកម្ពុជាទទួលបានពីអាមេរិកសព្វថ្ងៃ ជាជំនួយសង្គមកិច្ច ដែលភាគច្រើនគេផ្ដល់ឲ្យក្រុមអង្គការសង្គមស៊ីវិលមួយចំនួន ដែលមាននិន្នាការនិងគោរពតាមគោលការណ៍ ដែលអាមេរិកបានដាក់ឲ្យ។ ចំណែកឯជំនួយពីចិនវិញ ជាជំនួយផ្នែកសេដ្ឋកិច្ច ដែលជាជំនួយធំបំផុតសម្រាប់ជំរុញឲ្យកម្ពុជាមាននិរន្ដរភាព សេដ្ឋកិច្ច មានឥស្សរភាព និងមានការអភិវឌ្ឍន៍ដូចសព្វថ្ងៃ។
ឯកឧត្តមផៃ ស៊ីផានបានមានប្រសាសន៍ពន្យល់ថា “ជំនួយសហរដ្ឋអាមេរិកគេហៅថាSBA ដែលជាជំនួយឧបត្ថម្ភក្នុងការងារសង្គមកិច្ចពាក់ព័ន្ធភាគច្រើន អង្គការមិនមែនរដ្ឋាភិបាល គឺមិនមានពាក់ព័ន្ធនឹងដំណើរការសេដ្ឋកិច្ចនោះទេ...រីឯជំនួយរបស់ ប្រទេសចិន...ទី១.គឺឈរទៅលើកិច្ចពង្រឹងសេដ្ឋកិច្ច ដែលគេហៅថា SBI ដែលជាជំនួយបណ្ដាក់ទុនផ្ទាល់...អាស្រ័យហេតុដូច្នេះហើយ ជំនួយប្រទេសចិនគឺជាជំនួយដែលធ្វើឲ្យយើងមានឥស្សរភាពសេដ្ឋកិច្ច ...”។
លើសពីនេះទៀត មន្ដ្រីជាន់ខ្ពស់រាជរដ្ឋាភិបាលរូបនេះ ក៏បានបន្ដទៀតថា ជំនួយរបស់ប្រទេសចិន មិនត្រឹមតែធ្វើឲ្យកម្ពុជាមានកំណើនសេដ្ឋកិច្ច ដោយគិតជាផលិតផលសរុប៧% រហូតនាំឲ្យមានការវាយតម្លៃខ្ពស់ពីធនាគារពិភពលោកនិងធនាគារអភវឌ្ឍន៍ អាស៊ីប៉ុណ្ណោះទេ ជំនួយពីប្រទេសចិន គឺធ្វើឲ្យកម្ពុជា មានលទ្ធភាពក្នុងការពារអធិបតេយ្យភាពទៀតផង។ “...គឺជំនួយមួយចំណែកធ្វើឲ្យកម្ពុជាមានលទ្ធភាពក្នុងការបម្រើ កិច្ចការពារអធិបតេយ្យភាព...ដូចជាជំនួយក្នុងការពង្រឹងវិស័យកងទ័ព នៅពេលដែលសហរដ្ឋអាមេរិកផ្ដាច់ជំនួយកងទ័ព ស្របពេលហ្នឹងមានការវិវាទអាវុធជាមួយប្រទេសថៃ យើងឃើញថា ចិនបាននាំមុខ រួចធ្វើឲ្យយើងមានលទ្ធភាព សមត្ថភាព ក្នុងការពារអធិបតេយ្យកម្ពុជាដែលអាមេរិកាំងអត់ដែលនឹកឃើញជួយនោះទេ ...”។
គួររំលឹកថា កាលពីថ្ងៃទី១០ ខែឧសភា លោកសម រង្ស៊ី បានបង្ហោះនៅក្នុងទំព័រហ្វេសប៊ុកផ្ទាល់ខ្លួនរបស់លោកដោយបាន ប្រៀបធៀបជំនួយពីប្រទេសចិន និងពីសហរដ្ឋអាមេរិកថា “ជំនួយពីប្រទេសចិន ភាគច្រើន ផ្តល់ជាអំណោយ និងប្រាក់កម្ចីដែលរដ្ឋាភិបាលយកទៅប្រើប្រាស់ដោយខ្ជះខ្ជាយ និងដោយប្រព្រឹត្តអំពើពុករលួយតាមតែអំពើចិត្ត។ ប្រាក់កម្ចីដ៏សន្ធឹកសន្ធាប់ គឺជាការដាក់បន្ទុកយ៉ាងធ្ងន់ទៅលើកូនចៅយើងជំនាន់ក្រោយ ដែលនឹងត្រូវសងបំណុល ដែលរដ្ឋាភិបាលសព្វថ្ងៃ បានខ្ចីពីបរទេស។ ជំនួយពីសហរដ្ឋអាមេរិក ភាគច្រើនផ្តល់ជាផលប្រយោជន៍ឲ្យប្រជាពលរដ្ឋ ក្នុងវិស័យពាណិជ្ជកម្ម និងវិនិយោគ។ ជំនួយបែបនេះ ជួយឲ្យសេដ្ឋកិច្ចរីកចម្រើនយ៉ាងជាក់ស្តែងដោយបើកទីផ្សារយ៉ាងធំឲ្យ ទំនិញផលិតនៅកម្ពុជា និងដោយជម្រុញឲ្យក្រុមហ៊ុនដ៏ល្បីល្បាញពីសហរដ្ឋអាមេរិក មកបើកសហគ្រាស និងរោងចក្រនៅប្រទេសកម្ពុជាដែលនឹងនាំមកនូវការបង្កើតការងារដ៏ល្អ ប្រសើរ (ពលករជំនាញខ្ពស់ ប្រាក់ខែច្រើន) ឲ្យប្រជាពលរដ្ឋក្នុងស្រុក ជាពិសេសយុវជន៕
ចំនួនអ្នកទស្សនា
- ថ្ងៃនេះ781
- ម្សិលមិញ4001
- សប្តាហ៍នេះ18371
- ខែនេះ212971
- ឆ្នាំនេះ212971
- សរុប20655427